Wythnos Genedlaethol Diogelu 2025

Wythnos Genedlaethol Diogelu : 10 - 14 Tachwedd 2025 

Arferion diogelu cadarnhaol yw thema rhaglen eang ei chwmpas sy’n cael ei chynnal ar draws Canolbarth a Gorllewin Cymru ar gyfer Wythnos Diogelu Genedlaethol, sy’n dechrau ar 10 Tachwedd 2025. Cydlynwyd y rhaglen gan CWMPAS a CYSUR, y Bwrdd Diogelu Rhanbarthol, ac eleni fe’i cynlluniwyd mewn ymateb i rai o’r themâu a materion diogelu sydd wedi dod i’r amlwg ar draws y rhanbarth yn ystod y flwyddyn ddiwethaf.

Mae uchafbwynt yr wythnos yn cynnwys cynhadledd ar gyfer ymarferwyr amlasiantaeth, a gynhelir yn yr Egin, Caerfyrddin. Bydd y gynhadledd yn cynnwys cyflwyniadau a gweithdai gan brif siaradwyr ac yn cynnwys cyflwyniad ar ganlyniad a chanfyddiadau’r adolygiad a gynhaliwyd yn dilyn yr hyn a ddigwyddodd yn Southport ym mis Gorffennaf 2024, gwybodaeth am fodel ymarfer y newid mwyaf arwyddocaol, bregusrwydd mewn niwroamrywiaeth, defnyddio deallusrwydd artiffisial i gefnogi rhannu gwybodaeth, ochr yn ochr â mewnbwn gan ddefnyddwyr gwasanaeth a’r rhai sydd â phrofiad bywyd. 

Yn ystod yr wythnos, byddwn hefyd yn cynnal amrywiaeth o ddigwyddiadau a gweminarau a fydd yn ceisio codi ymwybyddiaeth ac amlygu materion sy’n effeithio ar blant ac oedolion sy’n wynebu risg. Mae hyn yn cynnwys gweminar sy’n ailedrych ar elfennau allweddol Deddf Galluedd Meddyliol 2005 a sut y dylid eu cymhwyso mewn ymarfer diogelu mewn amrywiaeth o sefyllfaoedd, cyd-destunau a senarios. Yn ogystal, byddwn hefyd yn cynnal gweminar yn rhannu canfyddiadau adolygiad thematig 2025 o adolygiadau ymarfer oedolion yng Nghymru. Byddwn hefyd yn cynnal gweminar sy’n tynnu sylw at wasanaeth sy’n rhad ac am ddim ar gyfer diogelu pobl agored i niwed â dementia, sydd mewn mwy o berygl o fynd ar goll (Protocol Herbert). Ochr yn ochr â’r digwyddiadau hyn, bydd mewnbwn gan grwpiau trydydd sector a grwpiau annibynnol gyda digwyddiadau gan New Pathways, Sefydliad Lucy Faithfull Cymru, NSPCC Cymru a Mind Llanelli.

Mae rhaglen lawn ar gael i'w lawrlwytho, ynghyd â dolenni i bob taflen wybodaeth am y digwyddiad. Am ddigwyddiadau lleol yn eich ardal, gweler y rhaglen isod.

Rydym hefyd yn eich gwahodd i'n dilyn ar y cyfryngau cymdeithasol - X @CYSURCymru, Facebook @CYSURCymru ac Instagram @cysurcymru i gael yr wybodaeth ddiweddaraf am ddiogelu drwy gydol yr wythnos.